A24 Xeber

ABŞ-ın nüfuzlu yəhudi təşkilatının toplantısında Azərbaycanla bağlı müzakirə aparıldı

ABŞ-ın nüfuzlu yəhudi təşkilatının toplantısında Azərbaycanla bağlı müzakirə aparıldı
62
05 Mart 2018 - 11:00

Vaşinqton şəhərində ABŞ-ın nüfuzlu yəhudi təşkilatı olan Amerika İsrail İctimai İşlər Komitəsinin (AİPAC) illik siyasi konfransı çərçivəsində Azərbaycan-İsrail tərəfdaşlığına dair “Yeni sərhədlər: İsrailin Qafqazda və Mərkəzi Asiyada strategiyası” mövzusunda seminar keçirilib.

Azərbaycanın ABŞ-dakı səfirliyindən APA-ya bildirilib ki, 250 nəfərədək ictimai-siyasi, akademik, biznes və diplomatik korpus dairələrin nümayəndələrinin qatıldığı seminarda  əvvəlki illərdəki kimi Azərbaycanın ABŞ-dakı səfiri Elin Süleymanov, Avrasiya Yəhudilərinə Dəstək Milli Koalisiyasının vitse-prezidenti Mark Levin, tanınmış politoloqlar – Corctaun Universitetinin professoru Brenda Şaffer və Mərkəzi Asiya-Qafqaz İnstitutunun İpək Yolu Tədqiqatları proqramının direkoru Svante Kornel iştirak edib.

E. Süleymanov Azərbaycanın dünyanın ən strateji qovşaqlarından birində yerləşdiyini və müxtəlif mədəniyyətləri birləşdirən məkan olduğunu vurğulayıb. Diplomat bu il Azərbaycanın Xalq Cümhuriyyətinin yaranmasının 100 illiyini xatırladaraq, müsəlman Şərqində ilk demokratik respublikanın məhz Azərbaycanda yarandığını dinləyicilərin diqqətinə çatdırıb və bunun da Azərbaycan cəmiyyətinin dərin tolerantlıq ənənələrinin bir göstəricisi olduğunu bildirib.

Səfir Azərbaycan ilə ABŞ arasında mövcud olan strateji əməkdaşlıq çərçivəsində ölkəmizin Əfqanıstanda sülhməramlı əməliyyatın aparılmasında olan dəstəyi, dünyanın enerji xəritəsində artan rolu və yeni İpək Yolunun mərkəzində dayanan irimiqyaslı nəqliyyat layihələrin təşəbbüskarı olaraq ABŞ ilə iqtisadi münasibətlərin inkişafına müsbət təsir göstərdiyini vurğulayıb.

Azərbaycanla İsrail arasında münasibətlərin dostluq və əməkdaşlıq əsasında qurulduğunu xatırlayan diplomat İsrail dövlətinin müsəlman dünyası ilə əlaqələri qurmaq prosesində Azərbaycanın aparıcı və əhəmiyyətli rolunu qeyd edib.

Azərbaycanda müsəlmanlar, yəhudilər və digər dini icma üzvlərinin dostluq və mehribanlıq şəraitində yaşadığını qeyd edilibmiş və hər bir Azərbaycan vətəndaşı üçün Azərbaycanın ərazi bütövlüyü uğrunda mübarizə apararaq şəhidlik zirvəsinə yüksəlmiş milliyətcə yəhudi olan Azərbaycan Milli Qəhrəmanı Albert Aqarunovun əsl vətənpərvərlik nümunəsi olduğu da vurğulanıb.

Mark Levin, Brenda Şaffer və Svante Kornelin çıxışlarında ekstremizmə və radikalizmə qarşı mübarizədə Azərbaycan təcrübəsinin digər dövlətlər üçün də faydalı ola biləcəyi deyilib. Azərbaycan torpaqlarının 20 faizinin işğal altında olduğunu və bir milyondan çox məcburi köçkünün olmasına baxmayaraq, ölkə siyasətinin radikalizmdən uzaq olduğu qeyd olunub.

Hyuston-Bakı Qardaşlaşmış şəhərlər Assosiyasiyası tərəfindən Hyustonda ötən il Harvi qasırğası nəticəsində zərər görmüş yəhudi icmasının ən böyük dini məbədi – Bet Yeşurun sinaqoqunun bərpasında maddi yardımın göstərilməsinin ikitərəfli münasibətlərin davamlı inkişafına növbəti sübut olduğu bildirilib.

Qeyd etmək lazımdır ki, AİPAC təşkilatının hər il Vaşinqtonda keçirilən illik siyasi konfransı yəhudi icmasının ən böyük siyasi tədbiridir və tədbirdə 20000 nəfər yaxın iştrakçı, o cümlədən, ABŞ administrasiyasının və Konqresin  nümayəndələri, digər yüksək rütbəli xadimlər, həmçinin İsrail və digər dövlətlərin xadimləri qatılır.

Bu ilki konfransda ABŞ-ın vitse-prezidenti Mayk Pens, İsrailin baş naziri Benyamin Netanyahu, Albaniyanın baş naziri Edi Rama və Baltikyanı dövlətlərin xarici işlər nazirlərinin çıxışları nəzərdə tutulur.

SİZİN REKLAMINIZ BURADA

(336x280px)

ƏLAQƏ: +994 70 507 77 00